Hugo López García

Hugo López García


 

Se presenta a:

Consejo Ciudadano Autonómico

Biografía

Nací n’Uviéu en 1990 y soi carbayón de tola vida. Mio güela crióse en La Vega, mio ma en L’Argañosa y yo viví nel centru, en Teatinos y en Buenavista.

Graduéme en Periodismu pola URJC. Trabayé cinco años nuna axencia de marketing dixital y fui becariu en dellos medios de comunicación asturianos. Fixi de responsable de prensa de Xuníes Podemos n’Asturies nes campañes de les dos últimes eleiciones xenerales y anguaño soi parte arguyosa del equipu del nuestru Grupu Parlamentariu Confederal nel Congresu de los Diputaos.

Militante de Podemos dende los entamos en 2014, siempre anduvi implicáu en menor o mayor midida pero ye la primer vez que doi el pasu de presentame a los órganos de representación de la nuestra organización.


Motivación

Dende aquelles eleiciones europees que nos fixeron suañar con un cambéu de paradigma políticu, hebo bien d’altibaxos nel camín. Sicasí, cuando veo cómo la nuestra presencia nel Gobiernu estatal ta valiendo p’arrincar midíes que meyoren la vida de la xente, decátome que de veres pagaba la pena tantu esfuerciu, tantos palos, tanto caleyar.

La mio ilusión ye que podamos facer que n’Asturies Podemos seya tamién esa ferramienta amañosa y relevante, que trescienda a la protesta de pancarta o de valla y s’arremangue pa poner les instituciones al serviciu de la ciudadanía.

Anque llevo venceyáu al partíu dende siempre, y siempre n’Asturies, la verdá ye que nunca atopara una manera afayadiza pa contribuyir dende les mios capacidaes hasta que conocí a Sofía Castañón: una persona tan capaz como bonal, con quien el trabayu ye prestosu y provechosu. Una ayalga pa la nuestra organización qu’agora axunta a muncha xente valioso pa esti proyectu.

Tengo pa min que la manera que tien Sofía d’entender y practicar la política ye lo que precisamos pa dexar atrás dinámiques patriarcales y bunkerizantes, pa facer un Podemos Asturies onde toes podamos arimar l’hombru nun entornu afayadizu y seguru. Onde tomemos les necesidaes del país en serio. Onde’l feminismu, l’asturianismu y la ecoloxía seyan práctica y non solo retórica. Onde seyamos quien a axuntar fuercies adientro y afuera.